मलाई बादल हुने रहर छ
जहिले चाहू चाहाभरि विपनाको आकाशमा उडिरहू
जब चाहू आशाभरि सपनाको पर्दामा रमाइरहू

मलाई हावा हुने रहर छ
जहिले चाहूँ सीमाहीन क्षितिजमा बहिरहूँ
जब चाहूँ सृष्टिका कुना-कन्दरामा फैलिरहूँ

मलाई नदी हुने रहर छ
लाखौँ हण्डर र ठक्करहरू सहँदै
आफ्नै गतिमा निरन्तर बगिरहूँ
कठिन चट्टानका छातीहरू पन्छाउँदै
सागर भेट्ने लक्ष्यमा लम्किरहूँ

मलाई म हुने रहर छ
जहाँ बादलको जस्तो शून्यता होस्
हावाको जस्तो स्वतन्त्रता होस्
र नदीको जस्तो शाश्वत गतिशीलता होस्।