सायद तिमी नभएको भए
मैले कहिल्यै देख्ने थिइन
आफ्नै उचाइ

म त ती पहाडहरू हुँ
जसको फेदमा उभिएर तिमी औंला ठड्याउँछौ
तर चुचुरो छुन तिम्रा पाइलाहरू काँप्छन्
मेरो उचाइ नाप्न नसक्दा,
तिमी आफैँभित्र खुम्चिरहन्छौ।

तिम्रो यही इर्ष्याको राप त हो
जसले मलाई थप अग्लिन ऊर्जा दिन्छ
तिमी जति जली खरानी बन्छौ
म त्यति नै कुन्दन भई चम्किरहन्छु

धन्यवाद मायालु!
सायद तिमी नभएको भए
म मेरो विराटता कहिल्यै देख्ने थिइनँ